Даргагүй, дээр нь байргүй болж, нэмээд Орон нутгийн сонгуульд ялагдсан АН-ын хувь заяаг ирэх Ерөнхийлөгчийн сонгууль шийднэ гэхэд хилсдэхгүй болоод байна.
Хамгийн сайн шатар нүүж, хамгийн зөв тохироог хийж, хамгийн мэргэн менежерээр сонгуулиа удирдуулахгүй бол долоо бүдрэх болсон энэ үед экс Ерөнхийлөгч Ц.Элбэгдорж Ардчилсан намын гишүүнчлэлээ сэргээсэнтэй холбогдуулан янз бүрийн тааврууд хөвөрсөн. Одоогийн ерөнхийлөгчийг нэр дэвшвэл өрсөлдөх тухай ам нээсэн тэрээр АН-ын хэцүү цагийн сонголт уу, хэн нэгнийг аргалуулах золиос уу гэдгийг харах л үлдлээ. Ямартаа ч эзэнгүй хаягдах дөхсөн нам лидертэй болж, "Бодь" группыг бараадан байранд нь орсон. Ингээд эхний нүүдлээ ахмадуудаасаа эхлэв бололтой.
Нийслэлийн АН-ын ахмадууд түүнийг хүлээн авч, уулзалт хийлээ. Шинийн наймны билигт сайн өдөр болсон уулзалтын эхэнд Нийслэлийн АН-ын ахмадууд өөрсдийн гарын үсгээ зурсан намын далбааг Ерөнхийлөгч асан Ц.Элбэгдоржид бэлэг болгон гардуулсан юм. Ахмадууд ардчиллын төлөө 30 жил зүтгэсээр ирсэн түүнийг Ардчилсан намын гишүүнчлэлээ сэргээсэнд баяр хүргэж, залуустаа сургаал, зөвлөмжөө өгч ажиллахыг хүсчээ. Үүний хариуд, Ц.Элбэгдорж аль ч үеийн салхинд өөрчлөгдөөгүй, үргэлж дэмжиж ирсэн ахмадууддаа талархлаа илэрхийлэв. Ардчилсан намаас нийслэлийн ахмад гишүүддээ зориулан байр гарган өгч, тус байранд анхны уулзалтдаа Ерөнхийлөгч асан Ц.Элбэгдоржийг зочноор урьж, намын шинэчлэлт, ирээдүйн асуудлыг ярилцжээ.
