АНУ, Эмират, Судан улсын төлөөлөгчид өнөөдөр Абу Даби хотноо уулзаж, хэлэлцээр хийж байна. Энэхүү уулзалтаар талууд харилцаагаа хэвийн болгох оролдлого хийнэ гэж Израилийн сэтгүүлч Барак Равид мэдээлжээ. Тэрээр энэ мэдээллийг Суданы хэвлэлээс авсан гэнэ. Түүнд бичсэнээр, хэрвээ АНУ, Арабын нэгдсэн Эмират санхүүгийн тусламж дэмжлэг үзүүлбэл Судан улс Израилтай найрамдах гэрээг ойрын хугацаанд байгуулах ажээ.
Хартум хүмүүнлэгийн тусламж болон төсөвт шууд дэмжлэг хэлбэрээр гурван тэрбум ам.доллар авахыг хүсч байгаа гэнэ. Вашингтон, Абу Даби энэ тусламжийг ойрын гурван жилийн хугацаанд шилжүүлэх ёстой ажээ.
Хартум мөн Терроризм санхүүжүүлдэг улсуудын жагсаалтаас улсынхаа нэрийг хасуулах хүсэлтийг Д.Трампын засаг захиргаанд гаргаад байгаа. Гэвч ингэхийн тулд “Суданд халдлагад өртөж амиа алдсан америкчуудын ар гэрт 300 сая ам.долларын нөхөн төлбөр олгох” гэх зэрэг тодорхой нөхцөл шаардлагуудыг биелүүлэх хэрэгтэй болоод байгаа юм байна.
Ойрхи Дорнодод энх тайван тогтоох ажил ийнхүү эрчимтэй өрнөж байна. Тухайлбал, АНЭ, Бахрейн Израил улсууд энэ сарын 15-ны өдөр Цагаан ордонд энхийн гэрээнд гарын үсэг зурсан билээ.
